Hƿilon on sumere tide sƿa sƿa us segð seo racu
to-ƿearp se halga bisceop sum sƿiþlice hæþengild ·
þa sáh him ón sona | þæt cyrlisce folc
sƿyðe ƿedende sƿa sƿa hi ƿæron hæþene ·
⁊ heora án sona his sƿurd ateah ·
Se bisceop him to-geanes bræd of his ceppan ·
⁊ a-þenode his sƿuran þā sleandum hæþenū ·
⁊ se hæþena ða · þa þa he hine slean ƿolde ·
þa feoll he under-bæc mid fyrhte for-numen ·
⁊ bæd him forgifennysse æt þam halgan bisceope ·
Þysum ƿeorc ƿæs sum oþer gelíc
þa þa he eac toƿearp sum oðer hæþen-gild ·
þa sloh sum hæþen man to þā halgan ƿere ·
ac mid þam sƿenge hæpte þæt sƿurd him of handū ·
⁊ ne mihte nan hit næfre syððan findan ·
Ƿitodlice for-oft þa þa him ƿið-cƿædon
þa hæþenan þæt he heora hæþen-gild
sƿa hux-lice ne to-ƿende · þa bodode he him sƿa lange
þone soðan ge-leafan · oð-þæt he ge-liþe-ƿæhte ·
to geleafan heora ƿurðfullan templ ·
Sƿa micele mihte he hæfde menn to ge-hælenne ·
þæt nan adlig man naht eaðe him to ne com ·
þæt he ne ƿurde sona ƿundorlice gehæled ·