Mon cueur m'a fait commandement
De venir vers vostre jeunesse,
Belle que j'ayme loyaument,
Comme doy faire ma Princesse;
Se vous demandez pourquoi esse?
C'est pour savoir quant vous plaira
Alegier sa dure destresse,
Ma Dame, le sauray je ja?
Dictez le, par vostre serment
Je vous fais loyalle promesse,
Nul ne le saura, seulement
Fors que lui, pour avoir leesse;
Or lui monstrez qu'estes maistresse,
Et lui mandez qu'il guerira,
Ou s'il doit mourir de destresse,
Ma Dame, le saurai je ja?
Penser ne pourroit nullement
Que la doleur, qui tant le blesse,
Ne vous desplaise aucunement;
Or faictes donc tant qu'elle cesse,
Et le remectez en l'adresse
D'Espoir, dont il party pieca;
Respondez sans que plus vous presse.
Ma Dame, le sauray je ja?