Balades d'estrange façon — XLVII

Combien qu'adès ne vous voie,
Simple et coye
Ou est ma joye,
Que j'aim et serfs loiaument,
Ne pourroie nullement,
Vivre se je vous perdoie.

Car sanz vous je ne pourroie
Ne saroie
Ne vouldroie
Vivre un jour tant seulement,
Combien qu'adès ne vous voie.

Et si sachiez toutevoie
Que j'emploie,
Ou que je soye,
En vous tout mon pensement;
Car il n'est avancement
Qui me venist d'autre voie,
Combien qu'adès ne vous voie.