Et la mer & l’amour ont l’amer pour partage,
Et la mer eſt amere, & l’amour eſt amer,
L’on s’abyme en l’amour auſſi bien qu’en la mer,
Car la mer & l’amour ne ſont point ſans orage.
Celuy qui craint les eaux qu’il demeure au riuage,
Celuy qui craint les maux qu’on ſouffre pour aimer,
Qu’il ne ſe laiſſe pas à l’amour enflamer,
Et tous deux ils ſeront ſans hazard de naufrage.
La mere de l’amour eut la mer pour berçeau,
Le feu ſort de l’amour, ſa mere ſort de l’eau,
Mais l’eau contre ce feu ne peut fournir des armes.
Si l’eau pouuoit éteindre vn braſier amoureux,
Ton amour qui me brûle eſt ſi fort douloureux,
Que i’euſſe éteint ſon feu de la mer de mes larmes.