QVE vous auez d’appas belle nuict animee !
Que vous nous apportez de merueille & d’Amour :
Il faut bien confeſſer que vous estes formee
Pour donner de l’enuie & de la honte au iour.
La flame eſclate moins à trauers la fumee
Que ne font vos beaux yeux ſouz le funeſte atour,
Et de tous les mortels, en ce ſacré ſeiour,
Comme vn celeſte Obiect vous estes reclamee.
Mais ce n’est point ainſi que ces Diuinitez
Qui n’ont plus ny de vœux ny de ſolemnitez,
Et dont l’Autel glacé ne reçoit point de preſſe.
Car vous voyant ſi belle, on penſe à voſtre abord
Que par quelque gageure où Venus s’intereſſe,
L’Amour s’est déguiſé ſouz l’habit de la Mort.