Phebus in Hesperias quamquam nondum iverit undas,
vidi ego iam medios luce carere dies.
Tum mediam cum se niveo Latonia fratri
obiicit, et radios non sinit ire suos.
Sic mea non unquam miserum me fallit Aragne,
ante illam cum se perfida sistit anus.
O te longeve remorentur fila senecte,
nec vivas cupiens nec moriare volens.
Ut mihi siderei rapis, invida, lumen ocelli,
sic tibi iocundum subtrahat illa merum.