Calciope, o fer opem, tacito ne vulnere Petrus
occidat; egregio parce puella proco.
Da sibi quod postquam dederis, mira arte iuvabit,
et dices: «tacui quid male sana diu?»
Experiere pio quanta est in amore voluptas;
gaudia mile dabis, gaudia mile feres.
Dulce rogatur opus, rerum nec dulcior ulla est,
quam semel ut dederis sepe dedisse voles.
Et quis erit primos dignus decerpere flores?
Si Petrum expendis undique, Petrus erit.
Ac mihi si carum serves {a morte} sodalem,
in coelum calamo diva ferere meo.
Sin pereat, totum contra te Acheronta movebo,
et faciam versus in tua damna sacros.