Grata voluptatis species et causa favoris,
Fortior innumeris, venator Olympie, palmis,
Tu verum nomen membrorum robore signas,
Alcides collo, scapulis, cervice, lacertis,
Admirande, audax, velox, animose, parate.
Nil tibi forma nocet nigro fuscata colore.
Sic ebenum pretiosum atrum natura creavit;
Purpura sic parvo depressa in murice fulget;
Sic nigrae violae per mollia gramine vernant;
Sic tetras quaedam conmendat gratia gemmas;
Sic placet obscuros elephans inmanis ad artus;
Sic turis piperisque Indi nigredo placessit;
Postremum tanto populi pulcrescis amore,
Foedior est quantum pulcher sine viribus alter.