Struthion, ostrutium quod vulgi more vocatur,
vim calidam siccamque tenet. Radix fugat ejus
cum vino morbos jecoris, si trita bibatur,
ictericos sic sumpta juvat, splenisque tumorem
durum, quem Graeci sclirosim dixere, repellit.
Hocque modo lapides vesicae frangere dicunt,
menstrua sic lotiumque movet tussique medetur,
sic orthopnoicis prodest, si saepe bibatur.
Subdita matrici depellere fertur abortum,915
et sic tarda nimis educere menstrua tradunt;
acri cum vino si jungitur atque polenta
illius succus, lepras emundat inunctas.
Hoc etiam succo, juncto cum polline quod dant
hordea, curatur (ut dicunt) pustula quaevis,920
si superaddideris emplastri more dolori.
Illius succus cum melle terendo jugatus
humores capitis purgat si nare trahatur;
sternutamentum per se pulvis movet ejus,
naribus injectus veratro non segnius albo.
Ictericis succus mire medicabitur ejus,
hunc si nare trahant lacti mixtum muliebri.