Crevit ad ornatum stabuli circique decorem
Putior egregio reddita nympha loco
Quam cingunt variis insignia clara metallis
Crispatumque super scinditur unda gradum.
Excipit hanc patuli moles miranda sepulcri,5
Corporibus vivis pocula blanda parans.
Nec iam sarcophagus tristis sua funera claudit,
Sed laetos dulci flumine conplet equos.
Fundit aquas duro signatum marmore flumen,
Falsa tamen species vera fluenta vomit.10
Plaudite vos, Musae, diversaque, plaudite, signa,
Quae circum docili continet arte decor,
Et dum palmiferis post praelia tanta quadrigis
Garrula victores turba resolvit equos,
Praebete innocuos potus potusque salubres,15
Ut domino proprius gaudia circus agat.