Vive jucundae metuens juventae,
Crispe Laevini: fugiunt avarae
Mensium lunae, nimiumque volvi
Lubricus aether.
Tu licet multo pretiosus auro,
Gemmea vestem moderere zona,
Et super collo Tyrias amicet
Fibula lanas:
Jure Phoenissis vaga penna cristis
Stare labenti dubitat galero:
Jure, quo fulges, timidum refigi
Palluit aurum.
Quod tibi larga dedit hora dextra,
Hora furaci rapiet sinistra,
More fallentis tenerum jocose
Matris alumnum.
Mobiles rerum dubiique casus
Regna mortalis tenuere vitae:
Sedulus metae, properat fugacis
Impetus aevi.
Tardius ponto volat Adriano,
Quam ratem mersi pepulere remi,
Et repentinis animosa trudunt
Carbasa ventis.
Omnibus mundi Dominator horis
Aptat urgendas per inane pennas:
Pars adhuc nido latet, et futuros
Crescit in annos.