AMorem ocellis flammeolis herae
Vidi insidentem, credite posteri:
Fratresque circum ludibundos
Cum pharetra volitare & arcu.
Eheu pavore cor trepido salit,
Mensque icta amoris Numine devium
Lymphatur. Eheu parce telis,
Parce gravi puer acer igne.
Fas inquieta sit mihi gaudia,
Curasque dulces, cuspidis & tuae
Votiva vulnera, atque amicum
Arte lyrae celebrare amarum.
Fas & parentis regna Amathusidos
Porrecta late dicere; partaque
Tropaea de Titane, & astus
Mulciberis male pertinacis.
Tu vim leonum, tu tigrides domas,
Ceteque & uros: perque acies truci
Dextra Gradivum fulminantem
Mitem animis placidumque reddis.
Tu post Gigantum terrigenam manum
Fusam fugatam, tela Diespitri
Irata tollis: tu relicta
Coniuge sidereisque regnis,
Quandoque tauro dissimilem sui
Abdis vel auro; iam gelidis cygnum
Uris sub undis, iam salacem
Destruis in Satyrum aut in hircum.
Te bruta tellus, te maris aequora
Caelumque & invisi horrida Tartari
Sedes veretur: te veretur
Ipsa Hecate, Patruusque Pluto.