Singula turbans, omnia captans, omnia predans,
Singula tollens, omnia fallens, omnia fraudans,
Fons lacrimarum, crux miserorum, fax populorum,
Perfide sanctis, legis abusio, passio plebis,
Iuris nomine raptor maxime, post date tutor,
Tu nimium misere detonsor, Siboto, terre,
Pastor ovilia cogis, te, lupe, sanguine prodis,
Falso nomine tutor, factis dilaniator,
Alma prius tu iura lucellis subposuisti,
Serviciorum pondera pressis imposuisti.
Ille tuus iudex effulsit criminis index,
Quem rapuit busto demon sub iudice iusto,
Quo stupida pupa lusisset carne sepulta;
Qua cupida larva ferus ante subegerat arva.
Nam luit ille palam moriens, tu que tuleras clam!
Clam memoro: non quin hec tolleret in manifesto,
Nec sineret quicquam, sed iuris sub tegumento
Rem populi radens plebi predo, sibi iudex
Lucrum nomine iusticie per competa poscit.
Pro nichilo pendit ius, de quo commoda non sint,
Nomen cui bene das "ovium plus belua mordax",
Sic patria lingua deflexum preduce causa,
Ceu, pecorum raptus ut curet, sit latro natus.
Ah populos carpens vir, tanquam fuscina carnes,
Hic prior hac terra tutoria tunc sibi iura
Acer condidit, ob que nunc heu plebs gemit eque.
Quedam spernere gaudet; spes hoc cesaris audet,
Qui vetuit scriptis, quas fraus hec intulit istis,
Non tolerandas conditiones serviciorum,
Ordine iudiciorum scissas legitimorum.