L'ueil et le cueur soient mis en tutelle,
Si tost qu'ilz sont rassotez en amours,
Combien qu'il a plusieurs qui font les lours,
Et ont trouvé contenance nouvelle;
Pour mieulx embler priveement Plaisance,
Mommerie sans parler de la bouche,
En beaux abiz d'or cliquant d'Acointance,
Soubz visieres de semblant qu'on n'y touche,
Faignent souvent l'amoureuse querelle;
Ainsi l'ay vu faire en mes jeunes jours,
Vestu m'y suis à droit et à rebours;
Je jangle trop, au fort, je me rappelle.
L'ueil et le cueur, etc.