(PL 19 0345C)
Principio Dominus coelum, terramque locavit:
Namque erat informis, fluctuque abscondita tellus,
Immensusque Deus super aequora vasta meabat;
Dum chaos, et nigrae fuscabant cuncta tenebrae,
Has dum sidereo disiungit cardine, fatur:
Lux fiat, et laeto nituerunt omnia mundo.
Cumque Deus primi complesset facta diei,
Condidit albentem nebulis nascentibus axem.
Accipit immensus errantia littora pontus,
Multiplices rapiens validis cum tractibus amnes.
Tertia lux faciem terrarum fulva retexit.
Arida mox posito narratur nomine terra. (0346C)
Florea ventosis consurgunt germina campis,
Pomiferique simul procurvant brachia rami.
Quarta die generat solis cum lampade lunam,
Et stellas tremulo radiantes lumine pingit.
Haec elementa dedit subiecto insignia mundo,
Tempora quae doceant varios mutanda per ortus.
Quinta die accipiunt liquentia flumina pisces,
Et volucres varia suspendunt corpora penna.
Sexta pater gelidos in spiras lubricat angues,
Quadripedumque greges totos diffundit in agros,
Cunctaque multiplici mandavit crescere passim
Germine, et immensis errare, et pascere terris. (0347A)
Haec ubi constituit divina potentia iussu,
Rectorem inspiciens mundanis defore rebus,
Haec memorat: Hominem nostris faciamus in unguem
Vultibus assimilem, toto qui regnet in orbe.
Et licet hunc solo posset componere verbo,
Ipse tamen sancta dignatus ducere dextra,
Inspirat brutum divino a pectore pectus.